آخر تحديث: 28 أوت 2026
مرحبا بيك في بلادكم (bledkom.com). كيف تستعمل الموقع — تقرا فيه، تعمل حساب، ولا تحط إعلان — معناها موافق على الشروط هذي.
1. شنوّة بلادكم
بلادكم لوحة إعلانات لخمس أماكن: راس الجبل، رفراف، صونين، الماتلين، غار الملح. نجمعو البائع والشاري في بلاصة وحدة، وهذا الكل.
بلادكم موش طرف في الصفقة. ما نبيعو ولا نشرو حتى حاجة، ما نعاينو دار ولا كرهبة، ما نحبسو فلوس، وما ناخذو حتى عمولة. الصفقة بينك وبين الطرف الآخر.
2. حسابك
- الحساب لشخص واحد. اعطي معطيات صحيحة.
- أنت مسؤول على كلمة السرّ وعلى كل شيء يتعمل من حسابك.
- إذا شككت إلّي حدّ دخل لحسابك، قلّنا في الحين.
- الحساب متاعك إنت، ما تبيعوش وما تعطيوش لحدّ آخر.
3. الإعلانات
- حط الإعلان مجاني حالياً. إذا نبدّلو، نعلمو قبل.
- كل إعلان جديد ولا معدّل يتشاف من عندنا قبل ما يتنشر. معناها التعديل يرجّع الإعلان للانتظار مرّة أخرى.
- 5 تصاور في كل إعلان كحد أقصى.
- الإعلان يقعد ظاهر مدّة محدودة (حالياً 15 يوم)، والتاريخ يظهرلك في حسابك.
- الإعلان اللي وفّى وقتو يتخبّى وما يتمسحش. تنجم تحيّيه وقتلي تحب والتصاور تبقى موجودة.
4. آش ممنوع تحط
- حاجة موش متاعك، ولا ما عندكش الحق تبيعها
- حاجة ممنوعة قانوناً: مخدّرات، أسلحة، أدوية، حيوانات محمية
- تقليد ولا مزوّر
- تصاور موش متاعك، ولا تصاور مسحوبة من إعلان آخر
- رقم تلفون ولا معطيات متاع شخص آخر بلا إذنو
- ثمن كذّاب، ولا إعلان يوري حاجة ويبيع حاجة أخرى
- نفس الإعلان مكرّر برشة مرّات
- كلام مسيء، عنصري، سياسي، ولا جنسي
5. حقّنا نمنعو ونحذفو
نجّمو نعدّلو، نخبّيو، نرفضو ولا نحذفو أي إعلان، ونجّمو نغلقو أي حساب، إذا خالف الشروط هاذي ولا القانون. نحاولو ديما نفسّرو علاش، أمّا القرار في الأخير قرارنا.
6. السلامة — اقرا هذا
أغلبية الصفقات هوني تتعمل يد بيد. باش ما يغشّوكش:
- تلاقاو في بلاصة فيها ناس، وفي النهار.
- شوف الحاجة بعينك قبل ما تخلّص.
- ما تخلّصش من قبل ما تشوف. اللي يطلب منك تحويل فلوس قبل ما تتلاقاو، تسعة من عشرة متحايل.
- شوف الأوراق: عقد الدار، بطاقة الكرهبة الرمادية، الترقيم.
- إذا حاجة باينة رخيصة برشة على الحقيقة، أكيد فيها حاجة.
إذا شفت إعلان مشبوه، قلّنا على contact@bledkom.com.
7. مسؤوليتنا
نخدمو باش الموقع يمشي مليح، أمّا ما نجّموش نوعدوك:
- إلّي كل إعلان صحيح ولا كل بائع صادق — ما نعاينو حتى حاجة بعينها
- إلّي الموقع يخدم بلا انقطاع
- بنتيجة صفقة عملتها مع حدّ لقيتو هوني
بلادكم ما تتحمّلش خسارة جاية من صفقة بين مستعملين، في حدود ما يسمح بيه القانون.
8. الإشهار
الإشهار (البانيرات) حاجة أخرى غير الإعلان، وشروطو موضّحة في شهّر معانا. باختصار:
- الثمن على حسب المكان والمدة والقرى، ويتّفق عليه معانا مباشرة.
- نجّمو نرفضو أي إشهار بلا ما نفسّرو.
- كل إشهار يتكتب فوقو «إشهار».
- نحسبو النقرات كان. ما نحسبوش المشاهدات وما نوعدو بحتى عدد نقرات.
- الإشهار اللي وفَى وقتو يتخبّى، وينجم يرجع كيف تحيّيه.
- نجّمو نبدّلو مكان الإشهار في الصفحة إذا احتاج التصميم.
9. خدمة العناية بالديار
خدمة العناية بالديار تتباع لوحدها بالأورو وعندها اتفاق خاص بيها. الشروط هاذي ما تغطّيهاش.
10. التصاور والملكية
التصاور والكلام اللي تحطّهم يبقاو متاعك. كيف تحطّهم في الموقع تعطينا الإذن نعرضوهم في بلادكم وفي صفحات الموقع، وهذا الكل. كيف يتحذف الإعلان يتحذفو معاه.
تصميم الموقع والنصوص متاعو ملك بلادكم.
11. تبديل الشروط
نجّمو نبدّلو الشروط هاذي. كيف يصير تبديل مهمّ نعلمو بيه، وتاريخ آخر تحديث يتبدّل فوق.
12. القانون
الشروط هاذي تخضع للقانون التونسي، والمحاكم المختصّة هي محاكم بنزرت.